Փետրվարի 14-ին Ավագ դպրոցի մի խումբ սովորողներով մասնակցեցինք մի քննարկման, որը պատերազմների մասին էր։ Նախագիծը, որը ներկայացնում էր 12-րդ դասարանի սովորող Լուսի Ղարիբյանը, կոչվում էր «Պատերազմը՝ կրթության գործիք»։ Քննարկման ընթացքում խոսեցինք այն մասին, թե ինչպես պետք է սովորեցնել երեխաներին պատերազմական թեմաներ, թե ինչպես շատ փոքր տարիքից երեխաներին դուր է գալիս այն գաղափարը, որ նրանք իրենց ձեռքում զենք են պահում և ձևացնում, թե կրակում են ինչ-որ մեկին կամ պատերազմի մեջ են, բայց իրականում նրանք այնքան էլ չեն հասկանում «պատերազմ» հասկացությունը:
Մենք նաև քննարկեցինք բազմաթիվ ուղիներ, որոնցով ծնողները կարող են իրենց երեխաների հետ խոսել պատերազմի մասին, օրինակ, երբ նրանք խաղում են, ավելի հեշտ է երեխային այդպես բացատրել: Մենք խոսեցինք այն մասին, թե Հայաստանում երեխաներն ինչքան ավելի արագ են հասկանում պատերազմը՝ համեմատած այլ երկրների հետ, իսկ պատճառն այն է, որ մենք մշտական հարձակման տակ ենք հարևան-հակառակորդ երկրների կողմից։
Ընդհանուր առմամբ, քննարկումը բավականին պարզ ու հետաքրքիր էր մեզ համար, և, իհարկե, այն շատ կարևոր էր:
Վարազդատ Միքայելյան, 9-րդ դասարան